Fikse Veroudering

Fikse Veroudering

Ouderdom is geen geldige verskoning om nie te oefen nie. Trouens, oefening word later jare byna nóg belangriker, en kan juis tot ’n beter lewensgehalte bydra. ’n Mens moet in ag neem dat jou liggaam verander namate jy ouer word, en dat liggaamsvet ook toeneem.

Die meeste mense bereik hul maksimum spierkrag tussen 27 en 32 jaar; daarna kan die spoed en krag waarmee die spiere saamtrek, asook die uithouvermoë en elastisiteit van spierweefsel, geleidelik begin afneem. Van jou dertigste jaar moet jy dus 10 persent harder aan jou liggaam werk, andersins moet jy aanvaar dat jou gewig met tot vier kilogram elke tien jaar kan toeneem.

Verswakking en ouer word is nie sinonieme nie

Party mense glo, verkeerdelik, na vyftig is aftakeling ál wat voorlê. Onaktiwiteit kan ’n bose kringloop word. Jy oefen nie omdat jy styf en stram voel; intussen raak jou spiere en gewrigte al hoe swakker, en dit gee weer aanleiding tot nuwe pyne en skete. Hierdie agteruitgang kan vrygespring of verlig word deur aktief te bly en jou spiere, gewrigte en ledemate in te span.

Veral daaglikse strekoefeninge dra baie by tot die behoud van soepelheid. Begin die dag met ’n paar strekoefeninge sodra jy agterkom jy raak minder beweeglik.

Dit sal ’n rukkie duur voor verswakte spiere weer soepel word, maar met geduld en getrouheid sal jy voordeel trek. Die regte strekoefeninge werk stramheid teen sodat jy makliker, vinniger en dus méér kan beweeg. Boonop verlig dit die spanning in stywe spiere, asook sielkundige spanning, en bevorder die bloedsirkulasie – voorwaar terapie vir liggaam en gees.

 

Neem die besluit en begin op die regte manier

Wanneer jy vir die eerste keer met enige oefenprogram begin, of as jy drie maande of langer nie geoefen het nie, is dit baie belangrik om stadig te begin. Enige persoon ouer as 50 moet eers sy of haar dokter gaan spreek voordat jy met jou oefenprogram begin. Maak seker julle bespreek die volgende vrae voordat jy wegspring:

  • Het jy hartprobleme?
  • Ly jy aan hoë bloeddruk?
  • Ly jy aan asma?
  • Het jy ’n ernstige rugprobleem?
  • Het jy enige been- of gewrigsprobleme soos artritis?
  • Is jy baie oor- of ondergewig?
  • Behels jou werk dat jy baie sit?

Indien jou dokter toestem, is jy gereed vir die oefeninge wat jou ’n fikser, gesonder, fermer en gelukkiger mens sal maak.

Verander jou liggaam van “vetvergaarder” in “vetverbrander” 

Stap as produktiewe oefening word onderskat. Vir beginners, ongeag hulle ouderdom en fiksheidsvlak is dit die maklikste en natuurlikste aërobiese oefening. En wanneer beserings of ouderdom jou troef, kan ’n mens jou skete dikwels oordeelkundig wegstap.

As jy die LK FITNESS App het, en jy vind selfs die beginner afdeling moeilik, kan jy met stap begin en elke dag net een oefening op die app doen. Vermeerder dit dan weekliks totdat jy die hele beginner-program op ‘n dag kan voltooi.

Maak seker jy het gemaklike stapskoene. Begin deur rustig te stap en verhoog die tempo geleidelik. Namate jy fikser word, kan jy kort rukkies ook draf. Werk soms ’n opdraande op jou roete in.

Omdat suurstof betrokke is by vet vrystelling deur die vetselle, asook by die verbranding van vet in die spier selle, is jou asemhalingstempo baie belangrik. Jou asemhaling moet versnel, maar jy moet steeds ’n gesprek kan voer. As jy rooi in die gesig is en so uitasem word dat jy nie meer kan gesels nie, moet jy die pas vertraag.

Aërobiese oefeninge soos stap, draf, fietsry, ritmiese klasse en rondte-oefening (op die app) moedig jou vetselle aan om vet vry te stel pleks van op te gaar. Dit word teen ’n matige intensiteit gedoen (sowat 60-85% van jou maksimum harttempo). Probeer om 40-45 minute lank teen ’n matige pas aërobiese oefening te doen.

Vir regtig effektiewe vet verbranding is HIIT (High Intensity Interval Training) die gonswoord.  Navorsing het getoon dat jy met HIIT tot 40% meer vet kan verbrand. Jy sal HIIT ook weekliks op die LK FITNESS App aantref.

Dit is ’n oefen tegniek waar jy voluit oefen, met ander woorde álles gee teen 100% inspanning vir ’n baie kort tydjie, soos 30 sekondes, afgewissel met ’n  kort tydjie soos 30 sekondes se rus of rustiger oefen.

Die kort intense 30 sekondes neem jou harttempo baie hoog en dan bring jy weer jou harttempo af in die deel waar jy rus of rustiger oefen. Omdat dit so intens is, is jou oefensessie baie korter. Doen dit vir 12 tot 25 minute, afhangend van jou fiksheidsvlak.

Doen dit net een of twee keer per week en nooit twee dae na mekaar nie. Dit is ’n  baie intensiewe oefensessie en dit kan lei tot beserings indien jy dit oordoen. As jy dus baie onfiks, of ’n beginner is, word eers fiks met gewone kardiovaskulêre oefeninge soos stap of draf.

Een of twee keer per week se kardio (aërobiese oefening) is nie genoeg om jou liggaam te kondisioneer om vet vry te stel en te verbrand nie. Vir goeie resultate moet jy minstens vier keer per week oefen. Namate jy fikser word, kan jy jou program aanpas deur tot vyf sessies in te pas. As jy oefen vir gesondheid of om jou gewig konstant te hou is drie keer per week genoeg.

Oorweeg dit ook om met ligte gewigte te oefen. Dit sal help om jou spiere op te knap en te definieer, en jou spier selle aktiveer om vet te verbrand.

Wat jy ook al kies om te doen – maak seker jy geniet jou oefeninge en aktiwiteite!

Soveel vroue oefen verkeerd en kry nie die resultate wat hulle verdien nie. Linda Kriel se oefen en eetplanne het al duisende vroue gehelp. Begin vandag!

Laai die LK Fitness toep af!

Jy hoef nooit meer te wonder wat jy moet eet of hoe om te oefen nie. Jou oefen- en eetplan word weekliks vir jou uitgewerk. Die beste van alles, Linda Kriel – jou persoonlike oefen-instrukteur is altyd by jou!

  • Elke dag van die jaar ‘n ander oefenprogram via Beginners, Middelvlak en Gevorderde vlakke.
  • Gesonde eetplanne: Jy kan altyd kies tussen Banting en Lae GI.
  • Spyskaarte is manlijk om te volg en bevat geen eksotiese of duur kos nie.

Jou eerste 7 dae is GRATIS.

Laai die LK  Fitness toep nou af!

Leave a Reply